India Celebrating 68 Years of Independence. Are we really “Independent” ? (In Hinglish)


“Jahan daal daal par sone ki chidiya karti thi basera,woh bharat desh hai mera, woh bharat desh hai mera”

Symbolic-Colors-of-India

Image Courtesy : Sensational Colours

Bachpan me suna tha ki desh ko kabhi sone ki chidiya kaha jata tha par aisa sirf dadi nani se kahaaniyon mein hi suna tha. Aaj jab un kisson ki kalpana karti hun toh har kahaani khud me hi ek kalpana jaisi lagti hai jo kisi chhote bache ka mann behelane ke liye uski maa sunaya karti thi. Jab bade hue aur hosh sambhaala toh school me har saal 26th January ko Republic Day, 15th August ko Independence day aur 2nd October ko Gandhi Jayanti ki tarah manaate hue dekha par us jashan mein woh azaadi thi hi nhi kyunki woh national holiday har insaan ke liye bas ek extra holiday hi bankar reh gayee.Par kya kabhi kisi ne ek baar bhi sochne ki koshish kari ki us “gazzeted /national holiday” ko poore desh me bharat band kyun hota hai, Isliye nhi ki hum apni family ke saath mall me jaakar shopping karein aur kisi restaurant mein lunch dinner karke family/friends k saath time spend karein,balki isliye ki hum un soldiers (desh ke veer seepahiyon) ki qurbaaniyon ko yaad karein.

“Aye mere watan ke logon, zaraa aankh mein bhar lo paani,
Jo shaheed hue hain unki,zaraa yaad karo kurbaani”

Shayad hi hum logon mein se kisi ne kabhi India Gate par jalti Amar Jawaan Jyoti ki taraf dhyaan se dekha hoga aur yeh khayaal apne mann mein laye honge ki us Jyoti ko amar karne ke liye kitne veer jawaanon ne khud ki jaanein gawaayein.Shayad hi aise log honge jo India Gate ki wall par engraved naujawaanon ko yaad karne ke liye apna keemti samay mein se do pal nikaalkar unhe sache mann se yaad kiya hoga. Har koi bas us India Gate ke saamne selfies click karwaane me itna selfish ho gya ki bhool gye us jagah ko India Gate kyun kaha jaata hai.Aaj India Gate ka agar koi mahatva hai toh woh bas itna ki woh sabke liye ek picnic spot bankar reh gaya hai aur us pavitra jagah ko ganda karne ke liye hum sab zimmedaar hain. Aur itna hi nahi poore desh ko ganda karne ke liye bhi hum sab hi zimmedaar hai.

note 1000

Har roz jis indian currency ke note par Gandhi ji tasveer ko hum sab dekhte hain par unki kranti ko yaad shayad hi koi karta hogaa. Poori duniya ko shanti ka path padhaane ke liye jo ladhaayi unhone ladhi thi, use hum sab kyun bhool gye. Kitne khudgarz hain na hum extended weekend banaane ke liye us national holiday ka intezaar karte hain jisse humein short vacation milega . Par kisi ne kabhi yeh socha ki agar aaj hum sab yeh sukoon ki zindagi jee rahein hain toh woh sirf isliye kyunki kitne hi sipaahi shaheed hue,Bhagat Singh,Rajguru aur Sukhdev;Chandrashekhar Azad jaise kitne logon ne apni jaan ki kurbaaniyaan di. Agar is yug mein hum har raat chain ki neend se sote hain, toh uska saara credit un sab soldiers (Army,Navy,Air Force)ko jaata hai jo har raat apni neend gawaate hain aur har festival(Diwali,holi,eid,raksha bandhan) par apne parivaar ki khushiyon mein shaamil na hokar hum sabko khushiyaan dete hain.

Kehne ko toh year 1947 mein humaara Desh azaad ho gaya tha lekin jeene ki azaadi kabhi mili hi nhi.Aaj bhi puraane samaaj ke banaaye hue riwaaz humaare pairon ki zanjeerein bann gyee hain.Kyun har ladki aaj bhi shaam ke baad apne ghar se bahar nikalne se darrti hai,kyun koi ladki khud ko akele me mehfooz nhi samajhti aur shaadi ho jaane tak apne papa ki pari unki zimmedari nhi majboori bann jati hai. Kyun aaj har rishte ko shak ki nigaahon se dekha jaata hai aur shayad ab tak toh aap samajh hi gaye honge ki us milaavat ke zimmeda bhi hum sab hi hain.

noLove1

Aaj bhale hi hum sab 21st century mein jee rhe hain par kisi ko bhi apni marzi se pyaar karne ki permission kabhi mili hi nahi.Suna toh tha ki “Marriages are made in heaven “ lekin apne sache pyaar ko dhoondne ki azaadi na kisi ladki ko kabhi mili aur na hi kisi ladke ko,bas woh boyfriend aur girlfriend bankar reh gaye par sache jeevansathi na ban sake . Kya “True love at first sight” nhi ho sakta? Lekin usme bhi arranged v/s love marriage,inter caste aur inter religion ki aisi deewar khadi thi ki sacha pyaar apni pehchaan hi khone laga aur rishte sirf naam hi ke reh gaye. Aaj ke yug mein kyun love cum arranged marriages kyun nhi ho sakti jisko hum pichle yug mein “Swayamvar” ka naam dete the .Kya Har ladki bas duniya ki nafrat ,badle ki bhawna aur apne kartavyon ko nibhaane ki aag mein humeshaa sati banegii ki woh khud ki pehchaan hi khone lagegi aur kya usse itna bhi adhikaar nahi ki woh apni zindagi apni marzi se jee sake. Kya har ladki khud ko har din kurbaan karti rahegi, kabhi kisi ki beti bankar , toh kisi ki wife toh kisi ki maa banker. Kab milega usse apni khud ki pehchaan?

1d75b0fd1a504e49f4fc3e34c5f39317

बुंदेले हरबोलों के मुँह हमने सुनी कहानी थी,
खूब लड़ी मर्दानी वह तो झाँसी वाली रानी थी।।

Bas har ladki har din aisi hi jung ladhti hai aur apna saara jeevan kurbaan kar deti hai,lekin fir bhi usse kabhi khud ki pehchaan nhi milti. Jis pal ek ladki ghar se bahar kadam rakhti hai uske saath uske mata pita ki chinta saath nikalti ai aur jab tak woh ghar na laut jaaye unke mann me koi na koi khayaal aate rehte hain. Kyun koi ladki apni marzi se shringaar karke,gehne pehenkar khoobsurat nhi lag sakti,kyunki use pata hai ki woh har buri nazar ka shikaar banegi isliye woh khud ko surakshit karne ke lie sharam ke burkhe se khud ki nazrein jhukaaye aur mann me darr liye duniya ka saamna karne ke liye ghar se roz office ke liye nikalti hai.

Aaj bhi casteism,communism,racism aur religion ki deewaron ne logon ki soch ko kuch is tarah se judaa kar diya hai ki har insaan ko jeene ka adhikaar nhi mila hai aur shayad isliye festivals ka meaning nhi reh gaya aur bas ek formality bankar reh gaye hain. Main humesha se sochti thi ki jeevan ke jo khoobsurat rang ,Teej tyohaar,mehendi,mithaai,rangoli,sanskriti aur sabhyata humaare Hindustan mein hain woh aur kahin nahi,shayad isliye mere dil ne maan liya tha ki Jannat agar hai toh bas yahin hai,yahin hai, yahin hai. Lekin soch kar bahut bura lagta tha ki har koi paise kamaane ke junoon me apne desh,parivaar,sache pyaar aur rishton se door hota jaa raha tha aur isliye festivals apna meaning khone lage.Kyun na hum sab aane wale festivals ko ek saath manaayen jaise bachpan mein school mein manaate the. Fir lagenge Teej ke jhoole,fir khelenge pyaar ke rangon se holi,fir jalayenge gyaan ke Deepak aur fir manayenge har din Diwali,fir Eid par ek doosre ko denge Jadoo ki Jhappi aur har Christmas ban jaega Merry Christmas, Aisa sapna hai mera,kya kabhi is yug mein ho payega woh poora????”no-to-caste-system

Jab se maine Naukri ki duniya mein kadam rakha, tab se samajh mein aaya ki duniya ke har desh mein apne apne festivals ko manaane ke liye kam se kam 1 week ki holidays milti hain jaise Chinese New year kam se kam 7 se 15 din ke liye offices band, Europe me Christmas aur New Year par vacations aur Ramadan ke samay koi staff kaam nhi karta, fir humaare bharat mein Holi,Diwali,Eid,Good Friday,Janamashtmi ,Raksha Bandhan jaise festivals ki khushi ko mehsoos karne ka adhikaar kyun nhi mila aur in tyohaaron ka mahatva samajhne ke liye bas ek din hi kyun? Shayad isliye hi humesha se bonded/forced labour jesa feel hone laga ki subah se shaam tak kaam karne ke baad bhi naseeb me khaana nahi aur jo paise kamaane ke liye duniya ki race mein aage pahuchna chahte hain,unhi paison ko kamaane ki bhaag daud me zindagi ke sabse anmol palon ko khud se door kar rahe hain aur woh hain pyaar ke pal.

“Hum rahein ya na rahein kal,kal yaad aayenge yeh pal,
Pal yeh hain pyaar ke pal,chal soche ky a chhoti si hai zindagi,
Kal mil jaye, toh hogi khushnaseebi”

Mujhe har pal aisa laga ki koi Christian hone ki sazaa paa rha hai toh koi muslim hone ki jabki Hindustan aur Pakistan ko alag karne wale bhagwaan ji nhi insaan hi the kyunki duniya mein jo jannat (Kashmir)hai who seema ke us paar hai jahan jaane se har koi darrta hai aur ek aisa mandir hai jisko paane ke liye India aur Pakistan ek doosre ke dushman ban gye hain jabki yeh humesha se ek hi desh tha . Maine kahin suna tha ki Pakistan hi woh jagah thi jahan duniya ki sabse khoobsurat karigari,nakkashi,embroidery,zari work ki shuruat hui thi aur aise designs bane the jo aaj ke samay mein shayad hi kahin dekhne ko milen.

Har subah hum mein se kahin log mandir ke saamne baithkar pooja toh karte hain lekin us pooja ka koi mahatva nhi kyunki us shraddha aur aastha mein milaavat hoti hai theek usi tarah jis prakaar aaj kal khaane ki har cheez mein aur isiliye har bacha,buzurg,naujawaan kuposhan (lack of nutrients) ka shikaar ho rha hai.
Duniya ke sabhi deshon ne shayad zyada tarakki kar li hogi par jo sukoon Hindustan mein hai woh aur kahin nahi, bas kami hai toh honesty,pyaar,apne se badhon ke liye izzat,mann mein vishwas ki is sapne poora karne mein hum honge kaamiyaab,hum honge kaamiyaab ek din,

Ooho mann mein hai vishwas,poora hai vishwas hum honge kaamiyaab ek din.
Yeh Hindustan hi hai jahan par ek ladki jabse apna hosh sambhaalne lagti hai, wahin se apni shaadi ke sapne dekhne lagti hai aur apne Prince Charming ka intezaar karti hai jo usse armaanon ki doli mein bithaakar us jannat mein lekar jayega jahan koi andhera nhi,balki hoga toh bas beshumaar pyaar aur use yeh vishwas dilaata hai ki woh ek doosre ke saath milkar jeevan ki har mushkil ka saamna karne ke liye har kadam ek doosre ke saath challenge

Hum sab ne pyaar ko bas Heer Raanjhai ,Laila Majnu, aur Juliet ki nazron se hi dekha hai…kya pyaar bhai – behen ka nhi ho sakta jisme ek bhai apni behen ki raksha karne ke liye ussi behen se rakhi bandhwaate hue kasam khaata hai ki woh humesha uska surakshachachakra bankar us behen ki raksha karega.

Aaj har insaan ek doosre ka hi dushman bann gya hai….koi topper banne ke competition me apne friend ko success ki ladder samajhkar aasmaan tak pahunchna chahta hai toh kahin har insaan apni zindagi ka politician bana hua hai.Lekin soch kar bahut dukh hota hai ki zindagi ki is race mein bhaagte bhaagte har koi insaaniyat bhool gaya hai. Har kisi ne khud ko ek doosre se kuch is tarah se door kar liya hai ki ache aur bure me farak karna hi asambhav ho gaya hai. Hum sab ne aaj rishton ko aise taraazu mein tola hai jisme humanity se zyaada wazan(weight) money ka hai.woh kehte hain na “After all money matters”.

3-13

Meri nazar mein toh “ALLAH” shabd ka matlab hota hai“All are humans” aur Christianism me bataate hain ki “God is one”, Sikhism me “Satnaam Waheguru” aur hindu dharma mein bataate hain ki “Bhagwaan ek aur roop anek”.Toh fir insaan insaan mein yeh farak kyun jab sabka matlab ek hi banta hai. Kyun na ek baar fir hum desh ko aisi mushkilon se azaad karwayein aur sache dil se manayein “JASHN-E-AZAADI”. Jo khushiyon ke pal humne kahin kho diye woh waapis toh nahi mil sakte lekin aaj fir se kyun na ek nayee shuruaat karein,bas yahi hai meri sabse guzaarish.

“Chhodo kal ki baatein, kal ki baat puraani,naye daur mein likhenge,hum milkar nayee kahaani ,
Hum Hindustani,hum Hindustani,kyunki kisi bhi dharam se pehle hum sab hain Hindustani ”.

Jis hare rang ko hum sab muslim se jodhte hain ,wahi hara rang humare tirange ke teen rangon mein se ek hai aur haryaali ka bhi hai. Par afsos ki baat yeh hai ki pollution ka andhera kaale saye ki tarah badhta jaa rha hai jiski wajah se global warming hum sabke liye ek chinta ka kaaran ban gaya hai.Agar aise hi chalta raha toh aane wali generations ko shayad saans lene ki bhi keemat deni hogi.Har insaan agar khud ki soch mein badlaav lekar aaye aur pyaar ke paudhe lagaakar khushaali lane ki zimmedaari le toh kyun nhi banegi yeh duniya swarg se bhi sundar. Jis safed rang ko har insaan ne politician bana diya hai,uska sahi matlab shanti (peace) hota hai,par woh shanti kahin kho gayee hai. Kyun na hum sab ek hokar pyaar ke beej se aise paudhe lagaayein jisme nafrat ki koi jagah hi na reh jaaye aur pyaar ki haryaali se har jagah bahut khoobsurat ban jaye. Aur yahi hai is desh ke tirange me santri rang(orange) ka mahatva jo hai “Courage and strength”. Lekin yeh courage and strength alag rehkar nahi ek hokar aayega jaise humare flag me blue circle hai jo yeh bataata hai ki hum sab agar ekjut hokar is bharat ko swarg banaane mein lag jaye toh samaaj ki saari buraiyon ka vinaash ho jayega.

Par dukh ki baat toh yeh hai ki yeh sapna bas band aankhon se maine dekha aur jab aankhein kholi toh wohi samaaj ki buraaiyion ka andhkaar nazar aaya jisme maine khud ki awaaz aur pehchaan ko khote hue hi paaya. Toh kyun na hum sab saath hokar ek aise rishte me judh jayen jisme ego,jealousy,corruption,poverty aur aisi kahin buraaiyon ka vinaash karne ki kasam khaayen aur khud ke andar ke us raawan ko khatam kar dein jo khushiyon aur pyaar ke beech me rukaawat ban raha hai.

Jis din yeh sapna poora hoga us din se har ladki barsaat me mor (peacock) bankar apne armaanon ke pankh failaakar jhoom uthegi aur pairon mein payal pehenkar khushiyon ki baarish me naachegi. Mushkil zaroor hai par naamumkin nhi agar hum sab ek ho jayen aur tab hum sab milkar manaayenge “Jashn-e-Azaadi” aur jis Sone ki chidiya ke baare mein humne bas bachpan mein kahaani suni thi use poora hote hue dekh payen.Kaash ki aisa bhi koi Independence day hum sabki zindagi mein aaye ki hum sab ek hokar azaadi ki aisi patang udhaayen jiski har dor sache pyaar ke dhaage se bandhi ho aur aisi neev rakhein jiski buniyaad bas beshumaar pyaar ho.Yeh sapna tha mera aur bhagwaan ji se pray karungi ki kaash is sapne ko poora karne mein mujhe sahi raasta dikhayen.

!!!JAI HIND!!!

Tiranga_National_Flag_of_India-Republic_Day-203_big

– By “Deepika Khanna”

10346108_10152686205026623_2389046078223247943_n

Advertisements

One thought on “India Celebrating 68 Years of Independence. Are we really “Independent” ? (In Hinglish)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s